Трамптың шекара қабырғасын тұрғызып жатқан құрылысшы бригадалар Аризонадағы кемінде мың жылдық үнді археологиялық кешенінің бір бөлігін зақымдады
Las Playas Intaglio — Аризонаның оңтүстік-батысындағы Cabeza Prieta ұлттық қорығында шөл бетіне қаланған балық пішінді қасиетті геоглиф. Суреттің толық ұзындығы шамамен 83 метр. Мердігердің ауыр құрылыс техникасы 20 метрін басып өтті, яғни ескерткіштің шамамен төрттен бірін жойды.
Балық пішінді интаглио шөлдің бетіндегі қара «шөл күйігін» алып тастау арқылы жасалған, соның астынан ашығырақ топырақ көрінеді. Петроглифтен айырмашылығы, мұндай сурет тек жоғарыдан ғана көрінеді: оны төбелерден, ұшақтан немесе спутниктен көруге болады.
Ескерткішті қорықтың шығысында жері жатқан Тохоно О'одхам халқының ата-бабаларымен байланыстырады және жергілікті қауым рухани мақсатта әлі де барып тұратын киелі нысан деп санайды.
Шекара қызметі ескерткіштің әдейі емес, байқаусызда бүлінгенін мойындап, аман қалған бөлігін қорғауға уәде берді. Қалпына келтіру туралы сөз жоқ, өйткені интаглио үшін мұның өзі мүмкін емес: алынып тасталған шөл патинасы немесе жартас күйігінің қабаты табиғи жолмен екі-үш мың жылда ғана қайта түзіледі.
