Копенгагендегі Мемлекеттік өнер мұражайының мамандары графиканы қалпына келтіру кезінде атомарлық оттекті қолданбақшы: бұл зат табиғи күйінде Жерге жақын төмен орбитада кездеседі, деп хабарлайды The Art Newspaper Russia

Қорғасынды ақ бояу ежелгі дәуірден бастап ХХ ғасырға дейін кеңінен тараған, кейін қолданыстан шықты. Қорғасынды ақ бояу кейде өте жылдам қарайып кетеді. Қарайған жерлерді ағарту үшін дәстүрлі түрде булы немесе гель күйіндегі сутек асқынтотығы қолданылады, алайда бұл әдістер көркем туындыны жасауда пайдаланылған өзге материалдарға зақым келтіру қаупімен байланысты.

Копенгагендегі Мемлекеттік өнер мұражайының графика жинағындағы бүліну үдерістерін зерттеп, сақтаудың жаңа әдістерін әзірлеп жатқан сарапшылар тобы түбегейлі басқа тәсіл ұсынып отыр: атомарлық оттекті пайдалану. Бұл Жерге жақын төмен орбитада табылған оттектің жоғары реактивті түрі. NASA ғалымдары оның ғарыш аппараттарының беткі қабатына әсерін, кейінірек мәдени мұра объектілерін тазалауға қолдану мүмкіндігін зерттеген.

Бұл әдіс 1997 жылы сынақтан өткен болатын: Питтсбургтегі Энди Уорхол мұражайында Chanel үйінің іс-шарасы өтіп жатқанда қонақтардың бірі Уорхолдың «Ванна» (1961) картинасында ерін далабының іздерін қалдырған. Оны дәстүрлі құралдармен кетіру мүмкін болмаған, ал кенепті атомарлық оттекпен сәулелендіру дақты ғана емес, бірқатар жасырын кірді, сондай-ақ бояудың аса жұқа қабатын да жойған.

Қазір зерттеушілер хаттамаларды оңтайландыру үшін ластанудың әртүрлі түрлері бар макеттер мен үлгілерде сынақ жүргізіп жатыр және 2026 жылдың соңына қарай қондырғының зертханалық прототипін жасауды жоспарлап отыр.