Священник Синодтан алынған Ресейді жау шапқыншылығынан құтқару жөніндегі дұғаны оқиды
Лев Толстойдың «Соғыс және бейбітшіліктің» ІІІ томында келтірілген Ресейді құтқару туралы дұға есімізге түсті.
...дьячок аналой қойылатын кішкентай отырғышты, Троица күні тізерлей оқылатын дұғалар оқылатын дәл сол отырғышты шығарып, патша қақпасының алдына қойды. Діни қызметкер күлгін барқыт скуфьясымен шығып, шашын түзеп, күшін салып тізерледі. Бәрі де солай істеп, бір-біріне аңтарыла қарасты. Бұл Синодтан жаңа ғана алынған, Ресейді жау шапқыншылығынан құтқару туралы дұға еді.
— «Жасағандар Құдайы Тәңір, біздің құтқарушымыз Құдай, — деп бастады діни қызметкер, тек славян шіркеу оқырмандары ғана оқитын, орыс жүрегіне еріксіз әсер ететін ашық, даурықпасыз, жұмсақ дауыспен. — Жасағандар Құдайы Тәңір, біздің құтқарушымыз Құдай! Қазір мейіріммен, рақыммен өзіңнің момын халқыңа қара, адамгершілікпен тыңда, аяп, жарылқа бізді. Міне, жерінді дүрліктіруші, бүкіл ғалам жүзін қаңыратқысы келген жау бізге қарсы көтерілді; міне, заңсыз халықтар сенің мұраңды жоюға, қасиетті Иерусалимінді қиратуға, өзің сүйген Ресейді тозаңдатуға, ғибадатханаларыңды арамдауға, құрбандық орындарын қазып тастауға, біздің қасиетімізді қорлауға жиналды. Қашанға дейін, Тәңірім, қашанға дейін күнәһарлар мақтанады? Қашанға дейін заңбұзушы өктемдік жүргізеді?
Ием, Тәңірім! Саған жалбарынған бізді тыңда: ең тақуа, ең дербес ұлы мемлекет иеміз император Александр Павловичті құдіретіңмен нығайта гөр; оның әділдігі мен жұмсақтығын еске ал, өзің сүйген Израильді сақтап келе жатқан игілігіне сай сыйын бер. Оның кеңестерін, бастамалары мен істерін батаңа бөле; құдіретті оң қолыңмен оның патшалығын бекіт және Мұсаға Амалекке, Гедеонға Мадиамға, Дәуітке Голиятқа қарсы бергендей, жауды жеңуді бер. Оның әскерін сақта; сенің атыңмен қару асынғандардың білегіне мыс садақ бер, оларды шайқасқа күшпен белдендір. Қару мен қалқанды алып, бізге көмекке тұр: бізге жамандық ойлағандар ұятқа қалып, масқара болсын, олар сенімді әскердің алдында жел алдындағы шаңдай болсын, ал сенің құдіретті періштең оларды қорлап, қуалаушы болсын; олар білмейтін тор оларды шырмасын, өздері жасырған тұзақ өздерін құшсын; олар құлдарыңның аяғы астына құласын, біздің жауынгерлеріміздің тапталымына түссін. Ием! Көпті де азды да құтқаруға сенің шамаң жетпей қалмайды; сен Құдайсың, адам саған қарсы дегеніне жетпесін.
Әкеміз Құдай! Ежелден келе жатқан рақымың мен мейіріміңді еске ал: бізді жүзіңнен қумай, біздің татымсыздығымызды жиренбей, ұлы мейіріміңе сай аяй гөр, рақымыңның молдығымен заңсыздықтарымыз бен күнәларымызға көз жұма гөр. Біздің жүрегімізде таза жүрек жарат, құрсағымызда түзу рухты жаңарт; бәрімізді саған деген сенімімен нығайта гөр, үметпен бекіт, бір-бірімізге деген шын махаббатпен жандандыр, саған және біздің әкелерімізге берген иелігімізді әділ қорғауға тату-тәтті бірлікпен қаруландыр, әділетсіздердің таяғы киелілердің үлесіне көтерілмесін.
Біз сенетін және үміт артатын Құдайымыз Тәңір, бізді мейіріміңе деген күткенімізден ұятқа қалдырма, игілікке белгі көрсет, бізді жек көретіндер де, біздің православие дінімізді жек көретіндер де көріп, ұятқа қалып, жойылсын; барлық елдер де сенің атың — Тәңір екенін, біздің сенің халқың екенімізді білсін. Ием, бізге қазір мейіріміңді көрсет, құтқаруыңды бер; құлдарыңның жүрегін мейіріміңмен қуантта; жауларымызды жық, оларды сенімді құлдарыңның аяғының астында тез күйрет. Өйткені сен саған үміт артқандардың қорғаны, көмегі және жеңісісің, саған ұлылық айтамыз, Әкеге, Ұлға және Киелі Рухқа, қазір де, үнемі де, ғасырлар бойы. Әумин».
