Ескі үйдің қоймасынан шпионаж үшін елден қуылған америкалық елшілік қызметкерінің түсірген сталиндік Мәскеудің және КСРО-ның басқа қалаларының суреттер мұрағаты табылды
Мәскеуде жүрген, елшілікке бекітілген америка армиясының майоры Мартин Манхофф жүріп-тұруы шектеулі болса да, өте қарама-қайшы кеңес әлемінің бірегей фотосуреттерін түсіре алды. Америка армиясының майоры Мартин Манхофф АҚШ-тың Мәскеудегі елшілігінде 1952 жылғы ақпаннан 1954 жылғы маусымға дейін қызмет етті, сол кезде шпионаж жасады деп КСРО-дан қуылды. Кеңес Одағында болған екі жыл ішінде Манхофф көп саяхаттап, көргенінің басым бөлігін түрлі-түсті слайдтарға және 16 миллиметрлік түрлі-түсті таспаға түсірді.
Оның суреттеріндегі Мәскеу батыстық та емес, шығыстық та емес, еуропалық та емес. Түсірілгеннің көп бөлігі XVIII, XIX және XX ғасырлардағы сәулет пен типаждардың таңғаларлық эклектикасын көрсетеді.
Манхофф Мәскеудің көше көріністерін жүргізушісі бар автомобильден түсірді, ал әйелімен бірге бөгде көзге жабық 1950-жылдардың басындағы Кеңес Одағындағы өмір туралы бояуы қанық жазбалар жасады.
Түрлі-түсті фотосуреттердің орасан коллекциясы мен ол түсірген 16 миллиметрлік таспа кедей әрі қатал күнделікті тұрмыстың аясында кеңес инфрақұрылымының екпінді дамуын құжаттады.
1954 жылы тыңшылық айыптауларына байланысты елден кетіп бара жатып, майор Манхофф саяхаттары кезінде түсірген таспа катушкаларын, жүздеген түрлі-түсті слайдтар мен негативтерді өзімен бірге алып кетті. Осы материалдардың бәрі Вашингтон штатындағы үйінің қоймасында қалып, жарты ғасырдан астам уақыт бойы ешкімге белгісіз жатты. Қазір олар тарихшы және аудармашы Дуглас Смиттің қолдауымен «Азаттық» радиосында «Манхофф мұрағаты» құрамында жарияланды
