Археологтар Қарағанды облысында қола дәуірінің ғұрыптық пирамидасын тапты
Қарағанды облысында археологтар рәсімдік пирамида тапты. Қола дәуіріне жататын жерлеу орны текті әмірші-уәзірге тиесілі болған, алайда адам сүйектері әзірге табылған жоқ.
Археологтар екі айдай уақыттан бері қарағанды даласында жұмыс істеп жатыр. Қазіргі таңда аумақты тазалау жұмысы аяқталды. Ғалымдар жерлеу орнының орталық бөлігінен топырақ алуға кірісті. Экспедиция жетекшісі, тарих ғылымдарының кандидаты, Қарағанды мемлекеттік университетінің жетекші ғылыми қызметкері Игорь Кукушкиннің пікірінше, пирамида біздің заманымызға дейінгі шамамен XIV-XII ғасырлардағы беғазы-дәндібай мәдениетінің ру ақсүйегіне тиесілі, деп хабарлайды «Новости-Казахстан» ақпарат агенттігі.
«Қазір орталық бөліктен топырақ алып жатырмыз, бұған дейін пішінін көру үшін тазалау жұмыстарын жүргіздік. Ортасында не бар екенін әзірше білмейміз», — деп түсіндірді агенттікке Кукушкин.
Қазба орнынан сондай-ақ қола пышақ, жебе ұшы, инелер, едәуір мөлшерде керамикалық ыдыс және үй жануарларының сүйектері табылды. Адам сүйектері әзірге табылған жоқ
«Біз бұл олжаны бірегей деп атай аламыз, Қазақстанда мұндай нәрсе әлі кездеспеген. Мұндай нысандарды саусақпен санауға болады, өйткені беғазы-дәндібай мәдениеті тек Қазақстанда, негізінен оның орталық бөлігінде ғана таралған», — деп атап өтті экспедиция жетекшісі.
Игорь Кукушкин нысан келесі жылы қалпына келтірілетіндер тізіміне енгізіледі деп үміттенеді – бұл археологтардың жұмысын айтарлықтай жеделдетуі мүмкін.
