Прагадағы Сталин ескерткішінің тарихы, 1950-жылдардағы байқаудан бұзылғанға дейін
1950 жылдары Голешовице паркінде, Прагаға қарайтын шолу алаңында Сталинге ескерткіш орнату туралы шешім қабылданды, бұл қаланы кеңес әскерлерінің фашистерден азат еткеніне он жыл толуына арналды. Бірақ мүсіншілер мүсін жасау жөніндегі ашық байқауға қатысуға асықпады, ал өтінім бергендердің ұсынған жұмыстары өте әлсіз болды. Нәтижесінде байқауда қазір тұтастай дерлік ұмытылған мүсінші Отакар Швец жеңіске жетті, естеліктерге қарағанда, ол екінші орынды иеленгенді қалайтынын айтқан екен. Әрине, ескерткіштің авторы бірден органдардың бақылауына түсті. Ол ішімдікке салынды, қатты депрессияға ұшырады және бес жылдық жобаның аяқталуына бір жыл қалғанда өзін-өзі тұншықтырып өлтірді. Автор өзінің азапты шығармашылығының нәтижесін көре алмады: бұл Сталиннің әлемдегі ең үлкен, биіктігі 15,5 метрлік мүсіні еді, оның арқасында кеңестік және чехословакиялық жұмысшылардың екі қатары тұрды. Прагалықтар бұл композицияны «қасапшыға тұрған кезек» деп атап, ұнатпады, ұнатпағанда қайтсін, құрылысқа жұмсалған ақша, ал бұл жүздеген миллион крон болатын, бүкіл елден мәжбүрлеп жиналды. Жеке басқа табыну әшкереленгеннен кейін ескерткішті бұзу туралы шешім қабылданды, оны бөлшектеудің ең қолайлы жолы жару деп саналды, бірақ Сталин бірінші реттен берілмеді, жарылғыш затты екі рет салуға тура келді. Сол кезде Прагада комендант сағаты енгізілді, қала тұрғындары кеңестік үстемдіктің символын бөлшектеуді бақыламасын, әсіресе суретке түсірмесін деген ниетпен. Ескерткіштің астындағы бос үй-жайларда картоп қоймасын жасады. Уақыт өте келе, 1990 жылдары бұл жерге алып метроном орнатылды.
