Stichting Ambulance Wens Nederland ұйымы өліп бара жатқандардың соңғы тілектерін орындайды
Өлім аузындағы бір әйел қайтыс болар алдында Рембрандттың картинасына қарауды сұраған. Бұл 2015 жылы Амстердамда болған, оның үстіне жағдай жалғыз емес: қала ауруханаларындағы ауыр науқастардың бірнешеуі өздеріне «Түнгі күзетті» және Рембрандттың көрмесін көрсетуді өтінген.
Ауыр халдегі адамдардың соңғы тілектерін орындау мүмкіндігі Stichting Ambulance Wens Nederland ерікті қайырымдылық ұйымының арқасында пайда болған, оның құрамында бірнеше жүз дәрігер бар.
Шын мәнінде, халықаралық деңгейде танылған бұл нидерландтық ұйымның басты құралы: медициналық қызметкерлері бар ерікті жедел жәрдем көліктері. Олар өліп бара жатқан адамдарға жүріп-тұру мүмкіндігін қайтарып, өмірінде мүмкін соңғы рет көргісі келетін жерлерге барып қайтуға жағдай жасайды. Ұйым 2007 жылдан бері жұмыс істеп келеді және өз қамқорындағылардың небір тілектерін орындайды: біреу бұрынғы жұмыс орнына барғысы келеді, біреу сүйікті саябағына, табиғаттың бір түкпіріне, сүйікті жирафы бар хайуанаттар бағына баруды сұрайды, енді біреу жай ғана бір бөтелке сыра ішуді, үйіне жетуді немесе галерея қабырғаларының арасында тұруды армандайды
