Леонардо да Винчидің қайтыс болуынан кейін оның қолжазбалары алдымен соңғы шәкірті Франческо Мельчиге өтті
Леонардо да Винчидің қайтыс болуынан кейін оның қолжазбалары алдымен соңғы шәкірті Франческо Мельчиге өтті. Бірақ жылдар өткен соң Мельчидің балалары да Винчи мұрағатын сатуға бел буды, оны тосканалық мүсінші Помпео Леони сатып алды.
Леони күнделіктердің бір бөлігін қайта құрастырды, дәптерлерді тігісінен сөкті, бытыраңқы парақтарды, жазбаларды, жыртындыларды жинап, осының бәрінен өз қалауынша екі атақты жинақ құрады. Біріншісіне, «Атлант кодексіне», техникалық сызбалар, әскери машиналардың сызбанұсқалары, сәулет жобалары және геометрия енгізілді. Өнер мен адам туралы ғылымға қатысты барлығын, яғни 600-ден астам сурет, анатомиялық зерттеу, жылқылар мен пейзаждардың нобайларын, географиялық карталар мен карикатураларды ол екінші кодекске біріктірді.
Кейінірек екі томның да иесі Леонидің күйеу баласы болған кезде, ол техникалық бөлікті граф Галеаццо Арконатиге сатты, ал граф оны Амброзиана кітапханасына сыйға тартты. Көлемі шағындау көркемдік бөлік сол кезде 1620-жылдары Англияға түсіп, 50 жылдан кейін Корольдік коллекцияға кірді, мүмкін, II Карлға сый ретінде. Мұрағаттың бұл бөлігі «Виндзор кодексі» деген атау алды.
Енді, 400 жыл өткен соң, конволюттің тұтастығын қалпына келтіру мүмкін болды. Флоренциядағы Галилео мұражайы Леонардо да Винчидің «Атлант кодексін» 500-ден астам беттермен қайта біріктіріп, шебердің сақталған ең үлкен альбомына толық көлемін қайтарды. Мұражай Leonardotheka 2.0 жобасын іске қосып, Миландағы Veneranda Biblioteca Ambrosiana кітапханасында сақталған 1119 беттік томға Британ корольдік коллекциялар қорынан шамамен 550 бет қосты. Жоба да Винчи мұрағатына бүкіл әлемнің зерттеушілеріне онлайн қолжетімділік береді.
