Финляндия кеден қызметі 2022 жылдың көктемінде ұстап қалған ресейлік мәдени құндылықтар ісі бойынша тергеуді аяқтады
Финляндия кеденшілері өнер туындылары тиелген автомобильдерді 2022 жылғы сәуірде ұстады. Тәркіленгендердің қатарында 200-ден астам жәдігер болды, соның ішінде Мемлекеттік Эрмитаждың, Третьяков галереясының, «Гатчина», «Павловск» және «Царское Село» музей-қорықтарының жинақтарынан алынғандары да бар. Ұсталғандар арасында бұрын Италиядағы көрмеде қойылған Антонио Канова, Жан Огюст Доминик Энгр, Виже-Лебрен және Джулио Карлини туындылары болды.
2022 жылдың көктемінде Ресей шекарасындағы Ваалимаа өткізу бекетінде мәдениет пен өнер заттарын ұстап қалу санкциялық заңнаманы бұзды деген күдікке негізделген еді. Алайда көп ұзамай Финляндия СІМ-і тасымалдауға ерекше рұқсат берді, одан кейін ұсталған мәдени құндылықтар Ресейге жөнелтілді.
Процестік тұрғыдан бұл іс тек қазір ғана түбегейлі аяқталды. Міне, сондай финляндиялық созбалаңдық.
